Wezîrê Parastinê yê Îsraîlê Israel Katz li merasîma leşkerî axivî û anî ziman ku artêşa wan amade ye ku operasyoneke nû li hemberî Îranê pêk bîne.

Katz got, "Eger pêwîst bike em ê cara sêyemîn û hîn bi xurtî li Îranê bixin" û diyar kir ku artêş amade ye ku careke din bikeve şer û li hedefên li Îranê bixe.

Serokwezîrê Îsraîlê Binyamin Netanyahu li heman merasîmê axivî û ragihand ku piştî du operasyonên leşkerî yên Îsraîlê Îran û hevalbendên wê yên li herêmê di asteke girîng de lawaz bûn. Netanyahu diyar kir ku li gel vê yekê şer hîn bi dawî nebûye.

ÎDÎAYA LI SER PLANA SÛÎQESTÊ YA LI DIJÎ TRUMP

Li aliyê din The Wall Street Journal û CNN'ê diyar kir ku Îsraîlê agahiyên îstîxbaratî yên planeke nû ya Îranê ya li dijî Donald Trump ji rêveberiya Dewletên Yekbûyî yên Emerîkayê (DYE) re ragihandiye. Li gorî nûçeyan, rayedarên Îsraîlî têkildarî plana ku îstîxbarata DYE'yê beriya niha ji hin aliyan ve tespît kiribû, agahiyên nû parve kir.

Qesra Spî têkildarî mijarê daxuyaniyeke fermî ya ku îdîayê derew nîşan dide, neda. Trump roja Çarşemê daxuyanî dabû û got, "Dixwazin min bikujin. Ez di lîsteya hedefê de me."

Îranê li ser îdîayên navborî hîn daxuyaniyeke fermî nedaye.